Istoria de la sivilia ueste

La sivilia ueste ave sua radises en Europa e la Mar Mediteraneo. Lo es liada a la Impero Roman e con la mundo cristian medieval ueste cual ia emerji de la eda medieval per esperia capitoles tan cambiante como la Renase, la Reformi, la Lumina, la Revolui Industrial, la revolui siensal e la developa de la democratia libraliste. La sivilias de Elas clasica e Roma antica es considerada periodos seminal en la istoria ueste; alga contribuis cultural ia emerji ance de la poplas pagan de la europa precristian, como la celtas e la germanicas, como ance alga contribuis relijial derivada de iudisme e iudisme eliniste orijinante en Judea e Galilea de la Templo Du e de la diaspora iudi temprana; e alga otra influes de Asia sude-ueste. Cristianisme (spesial catolicisme) ia ave un rol xef en formi la sivilia cristian, cual tra plu parte de sua istoria, ia es cuasi egal a cultur cristian (an si on ia ave cristianes estra la ueste, en Xina, India, Rusia, Bizantio e Asia sude-ueste). La sivilia ueste ia estende per produi la cultures dominante de America e Oseania, e ia ave influe global enorme en la sentenios ultima en multe formas.

A pos la cade de Roma en la sentenio 5, Europa ueste ia entra en la eda medieval, un periodo en cual la Eglesa Catolica ia pleni la vacua de potia lasada en la Ueste par la cade de la Impero Roman Ueste, en cuando la Impero Roman Este (o Impero Bizantian) ia dura en la este per sentenios, deveninte un contrasta elinica este a a ueste latina. En la sentenio 12, Europa ueste ia esperia un flori de arte e aprende, moveda par la construi de catedrales e la institui de universias medieval. La unia cristian ia es fratida par la Reformi en la sentenio 16. Un clase de mercatores ia crese estra la sites-stato, inisial en la penisola Italian, e Europa ia esperia la Renase de la sentenio 14 a la 17, con un eda de avansa tecnolojial e artal e gidante a un Eda de Descovre cual ia vide la crese de imperos global european como la espaniol, la portuges e la brites.

La Revolui Industrial ia comensa en Britan en la sentenio 18. Su la influe de la Lumina, la Eda de Revolui ia emerji de la Statos Unida e Frans como parte de un muta de la Ueste a un forma moderna democrata e industrida. La teras de America Norde e Sude, Africa Sude, Australia e Zeland Nova ia deveni prima parte de imperos european e a pos casa de novas nasiones ueste, en cuando Africa e Asia ia es divideda par potias ueste. Laborerias de democratia ueste ia es fundida en colonias brites en Australasia de la dui de la sentenio 19, en cuando America Sude ia crea autocratias nova. En la sentenio 20, la monarcia asoluta ia desapare de Europa, e an con episodios de faxisme e comunisme, sirca la fini de la sentenio cuasi tota Europa ia es elejente gidores de forma democrata. Plu de la nasiones ueste ia partisipa en la du geras mundal e ia sufri la gera fria. La Gera Mundal Du ia vide la vinse de faxisme en Europa, e la emerji de Statos Unida e Uni Soviet como potias global rival e un contrasta political "este-ueste" nova.

Estra en Rusia, la imperos european ia desintegra a pos la gera mundal du e la promoves de diretos sivil e migras multietnical e multicredal a Europa, America e Oseania ia basi la domina de la europeanes etnical en la cultur european. La nasiones european ia move a coopera economial e political plu grande tra le Uni European. La gera fria ia fini sirca 1990 con la colasa de la comunisme poneda par la sovietes en Europa este e sentral. En la sentenio 21, la mundo ueste reteni influe e potia economial global importante . La Ueste ia contribui a multe e grande aspetas tecnolojial, political, filosofial, artal e relijial de la cultur internasional moderna: esente un crisol de catolicisme, protestantisme, democratia, industri; la prima sivilia xercante aboli sclavia en la sentenio 19, la prima en permete ce femes vota (comensante en Australasia a fini de la sentenio 19) e la prima en usa tecnolojias como vapor, eletrica e potia nucleal. La Ueste ia inventa la sinema, televisa, la computador personal e interede; ia produi artistes como Michelangelo, Shakespeare, Rembrandt, Bach e Mozart; ia developa sportes como futbal, criceta, golf, tenis, rugbi e bascetbal, e ia ia transporta umanas a un ojeto astronomial en 1969 con la atera en 1969 de la Apollo 11 en la Luna.